Að mörgu er að hyggja þegar sótt er um starf eða þegar leitað er eftir starfsfólki. Talið er að einungis um 35% starfa séu auglýst opinberlega, þ.e. í dagblöðum og tímaritum. Það er því atvinnuleitandans að vera duglegur að „finna”þessi störf. Hægt er að fara margar mismunandi leiðir við atvinnuleit og ekki nokkur leið að vita hver þeirra kemur til með að ráða úrslitum. Hitt er ljóst að þeim mun fleiri leiðir sem reyndar eru, þeim mun meiri líkur á árangri.
Hér til hliðar eru upplýsingar fyrir félagsmenn í atvinnuleit, atvinnurekendur í leit að starfsmönnjum og ýmsar hagnýtar upplýsingar, sem vonandi gagnast félagsmönnum á vinnumarkaði.
Við hvað vil ég vinna?
Fyrsta skrefið í atvinnuleit vill oft gleymast! Það er sjálfskoðun. Til þess að ferilskrá og atvinnuleitin öll skili árangri er afar mikilvægt að leggja eftirfarandi spurningar niður fyrir sjálfum sér:
- Hverjir eru styrkleikar mínir og veikleikar?
- Hvað vil ég? / Á hverju hef ég áhuga?
- Hvar munu hæfileikar mínir njóta sín? / Hvers konar starf hentar mér?
- Hvert er markmið mitt á vinnumarkaði?
Þegar þessum spurningum hefur verið svarað ætti svarið við tveimur grundvallarspurningum að liggja fyrir:
- Í hvers konar umhverfi mun ég helst dafna og ná árangri?
- Í hvers konar umhverfi vil ég helst starfa?
Svarið er ekki einfalt og nauðsynlegt að hafa æskilega starfsferilsþróun í huga meðan svörin eru ígrunduð. Með það í huga má ekki eingöngu leita eftir störfum með ákveðnum titli heldur er nauðsynlegt að horfa á starfsumhverfið í heild og þá mögleika sem störf bjóða. Ekki er síður mikilvægt að gera sér grein fyrir því hvort eitthvað vanti upp á menntun og/eða starfsreynslu svo sett markmið náist.
Hér til hliðar eru flýtileiðir með leiðbeiningum til félagsmanna í atvinnuleit en einnig til þeirra sem vilja hugsa fram í tímann og skipuleggja starfsferil sinn í stað þess að láta hendingu að mestu ráða við hvað þeir vinna og hvar.
VM aðstoðar félagsmenn sína við að útbúa ferilskrár, gera persónubundna samninga vera þeim yfirhöfuð innan handar.